Imithetho Yenkundla Ye-Spotify

Umgomo we-Spotify uwukuvula amandla okusungula kwabantu – ngokunikeza izigidi zabaculi abangamaciko ithuba lokuphila ngobuciko babo kanye nezinkulungwane zezigidi zabalandeli ithuba lokujabulela futhi bakhuthazwe yibo. Sikholelwa ukuthi ukufinyelela lo mgomo enkundleni yethu kufezwa ukwamukela izinhlobo ezihlukene zokuzibonakalisa ngobuciko, imicabango, imibono, namazwi. Lokhu kungase kusho ukuthi okunye okuqukethwe enkundleni yethu kungase kungathandwa umuntu ngamunye noma okuqukethwe okutuswa i-Spotify.

Nokho, lokho akusho ukuthi uzenzela umathanda enkundleni yethu. Ngaphezu kwemigomo oyivumile elawula ukusebenzisa kwakho amasevisi ethu, le mithetho isiza ukuqinisekisa ukuthi wonke umuntu unokuzizwisa okuphephile nokujabulisayo.

Ithini imithetho?

Kungakhathaliseki ukuthi ungumculi, umenzi wama-podcast, noma unelinye igalelo, kubalulekile ukuqaphela lokho okuvunyelwe enkundleni yethu. Izibonelo ezisezigabeni ezingezansi ezokufanekisa kuphela futhi azihlanganisi konke.

Okuqukethwe Okuyingozi

I-Spotify iyikhaya lemiphakathi lapho abantu bekwazi khona ukusungula, baveze imizwa yabo, balalele, babelane, bafunde, futhi bathole isikhuthazo. Ungakhuthazi ubudlova, ugqugquzele inzondo, ukuhlukumeze, uqhwage noma uhilileke kwenye indlela yokuziphatha engase ibeke abantu engozini yokulimala okubucayi okungokomzimba noma ukufa. Okufanele ukugweme:

Okuqukethwe okukhuthaza noma okudumisa ukulimala okubucayi ngokomzimba okubhekiselwe kubantu ngabanye noma eqenjini kuhlanganisa, kodwa akugcini:

• ngokukhuthaza, ukuphromotha, noma ukudumisa ukuzibulala nokuzilimaza ngokwakho (uma wena noma othile omaziyo ethwele kanzima noma ecabanga ngokuzilimaza, sicela ubone lapha ukuze uthole izindlela zokuthola usizo)
• ngokugqugquzela noma ukusongela ukulimala komzimba okubucayi noma izenzo zobudlova eziqondiswe kumuntu othile noma iqembu elithile

Okuqukethwe okuphromotha noma okusekela ubuphekula noma ubushiqela obunobudlova kuhlanganisa, kodwa akugcini :

• ngokudumisa noma ukutusa amaqembu omashiqela abanobudlova noma amalungu awo
• ukuxhumanisa, ukuphromotha, ukusongela, noma ukutusa isenzo sobudlova esenziwe amaqembu omashiqela abanobudlova noma egameni labo noma amalungu awo
• ukunikeza iziyalezo noma izinto zeziyalezo zokwenza isenzo sobushiqela obunobudlova
• ukucela umuntu noma amaqembu ukuthi axhase ngokwezimali, enze isenzo sobudlova obeqisayo, noma bahileleke emsebenzini yamaqembu omashiqela abanobudlova

Okuqukethwe okuhlasela umuntu ngamunye noma iqembu elikwazi ukuphawulwa ukuze lihlukunyezwe noma ukuhlukumeza okuhlobene kuhlanganisa, kodwa akugcini:

• ngokuhlasela ngokuphindelela abantu abathile ngezenzo zokuheha ngokwezocansi
• ukuhlasela ingane ngokuphindaphindiwe ukuze uyibangele amahloni noma uyisabise
• ukwabelana noma ukwabelana kabusha ngokuqukethwe kokusondelana okungavunyelwene ngakho, kanye nezinsongo zokusabalalisa noma ukuveza lokho okuqukethwe
• ukwabelana, ukusongela ngokwabelana, noma ukukhuthaza abanye ukuthi babelane ngolwazi lomuntu siqu oluyimfihlo, okuhlanganisa ikhadi lokuthenga ngesikweletu noma ulwazi lwasebhange, izinombolo Zikamazisi Kazwelonke, njll.

Okuqukethwe okukhuthaza ubudlova noma inzondo ebhekiswe kumuntu noma eqenjini labantu ngokusekelwe kuhlanga, inkolo, ubulili noma lokho abayikho ngokobulili, ucansi, indabuko, ubuzwe, lokho okuncamelayo kwezocansi, isimo sokuba umakadebona, ubudala, ukukhubazeka noma ezinye izici ezihlobene nokubandlululwa noma ukucwaswa okuhleliwe kuhlanganisa, kodwa akugcini:

• ngokudumisa, ukusekela, noma ukukhuthaza udlame olubhekiswe kumuntu noma iqembu labantu ngokusekelwe ezicini ezishiwo ngenhla
• ngezitatimende ezehlisa isithunzi somuntu noma iqembu labantu ngokusekelwe ezicini ezibalwe ngenhla
• ngokuphromotha noma ukudumisa amaqembu enzondo nemifanekiso ehlobene nawo, kanye/noma izimpawu zawo

Okuqukethwe okuphromotha ulwazi lwezokwelashwa oluyingozi olukhohlisayo noma oludukisayo olungase lubangele ukulimala okwenzeka lapho ungaxhunyiwe ku-inthanethi noma lubangele usongo oluqondile empilweni yomphakathi kuhlanganisa, kodwa akugcini:

• ngokugomela ngokuthi i-AIDS, i-COVID-19, umdlavuza noma ezinye izifo ezibucayi ezisongela ukuphila zingamanga noma azilona iqiniso
• ngokukhuthaza ukuphuzwa kwemikhiqizo ye-bleach ukuze kwelashwe izifo nokugula okunhlobonhlobo
• ngokukhuthaza noma ukusikisela ukuthi imithi yokugoma yeziphathimandla zasendaweni iklanyelwe ukuthi ibangele ukufa
• ngokukhuthaza abantu ukuthi batheleleke nge-COVID-19 ngamabomu ukuze bakhe ukuvikeleka kuyo (isib. ukuphromotha noma ukubungaza “amaphathi e-coronavirus”)

Okuqukethwe okuphromotha ngokungemthetho ukudayiswa kwezimpahla ezilawulwayo noma ezingekho emthethweni kuhlanganisa, kodwa akugcini:

• ngokudayisa izibhamu ezingekho emthethweni noma izingxenye zezibhamu
• ngokudayisa izidakamizwa ezingekho emthethweni
• ngokudayisa izilwane ezisengozini yokushabalala noma imikhiqizo ethathelwe ezilwaneni ezisengozini yokushabalala

Okuqukethwe okuphromotha, okunxenxa, noma okukhuthaza ukuhlukunyezwa noma ukuxhashazwa kwezingane ngokocansi kuhlanganisa, kodwa akugcini:

• ngokuboniswa kwengane yenza izenzo zocansi noma ukuboniswa kwengane enqunu ngendlela evusa inkanuko
• ngokuphromotha izenzo zokuhlukunyezwa kwengane ngokocansi ukuze ithole imali
• ngokukhuthaza noma ngokuphromotha ukukhanukela kwabantu abadala izingane ezincane
• ngokuphromotha, ukujwayeza, noma ukudumisa izindlela zokukhulisa izingane ngokocansi

Okuqukethwe Okukhohlisayo

Ukusungula ukuzizwisa okuhle ku-Spotify kudinga ukwethemba ukuthi abantu bayilokho abathi bayikho, ukuthi ngeke bagetshengwe, nokuthi akekho ozama ukusonta inkundla yethu. Ungasebenzisi izindlela ezinonya ukuze ukhohlise abanye. Okufanele ukugweme:

Okuqukethwe okulingisa abanye ukuze bakhohliswe kuhlanganisa, kodwa akugcini:

• ngokuphindaphinda igama elifanayo, umfanekiso, kanye/noma incazelo efana neyomunye umsunguli okhona kakade
• ngokuzenza omunye umuntu, umkhiqizo, noma inhlangano ngendlela edukisayo

Okuqukethwe okuphromotha imidiya esontiwe nekhohlisayo njengeyiqiniso ngezindlela ezibangela ingozi yokulimala kuhlanganisa, kodwa akugcini:

• ngokurekhodiwe okulalelwayo noma kwevidiyo okuqhamuka emthonjeni wangempela nothembekile okushintshiwe ngendlela eshintsha incazelo noma umongo wemidiya yokuqala futhi okubikwa ukuthi iyiqiniso, ngaleyo ndlela ebangela ingozi yokulimala esikhulumini noma abanye abantu
• ngemidiya elalelwayo noma ebukwayo eyakhiwe ngokusetshenziswa kobuchwepheshe okuthiwa iyiqiniso, efana nokuqukethwe kocansi okulalelwayo nokwevidiyo noma okuqukethwe okusikisela ngokungeyikho ukuthi othile wenze ubugebengu obuthile

Okuqukethwe okuzama ukusonta noma ukuphazamisa izinqubo ezihlobene nokhetho kuhlanganisa, kodwa akugcini:

• ngokumelela ngokungeyikho izinqubo enqutsheni yomphakathi engase ingakhuthazi noma ivimbe ukubamba iqhaza
• ngokuqukethwe okudukisayo okuphromothwa ukuze kusongele noma kucindezele abavoti ukuze bangabambi iqhaza okhethweni

Okuqukethwe okuzama ukusebenzisa kabi umphakathi we-Spotify kuhlanganisa, kodwa akugcini:

• ngokuphosta, ngokwabelana, noma ngokunikeza iziqondiso zokusebenzisa imaliwe noma izinqubo ezinonya ezihlobene ezifuna ukulimaza noma ukuthola ukufinyelela okungagunyaziwe kumakhompyutha, amanethiwekhi, amasistimu, noma obunye ubuchwepheshe
• ngobugebengu bokweba imininingwane noma imizamo ehlobene ukuze kutholwe noma kuqoqwe ngokukhohlisa ulwazi olubucayi
• ngokuphromotha izinhlelo zokutshala imali nezezimali ezifana nezinhlelo zokuceba ngokushesha nezebhanayo, noma ngokukhuthaza abanye ukuthi bahlukane nemali ngokubakhohlisa

Okuqukethwe Okubucayi

Sinokuqukethwe okuningi okumangalisayo ku-Spotify, kodwa kukhona izinto ezithile esingazivumeli enkundleni yethu. Ungaxhumi okuqukethwe okunobudlova obudlulele noma okunyantisayo, futhi ungaxhumi izinto ezibonisa ucansi ngokusobala. Okufanele ukugweme:

Okuqukethwe okuphromotha ukuboniswa okuyingcaca noma okunyantisayo kobudlova, unya, noma eminye imifanekiso eshaqisayo kuhlanganisa, kodwa akugcini:

• ngemizimba ecwiyiwe noma enqunyiwe
• ngokuphromotha ukuhlukunyezwa noma unya olubhekiswe ezilwaneni

Okuqukethwe okuqukethe izinto ezibonisa ucansi ngokusobala kuhlanganisa, kodwa akugcini:

• ngezithombe zocansi noma imifanekiso yezitho zobulili noma ubunqunu obuboniswa ngenjongo yokuzanelisa ngokocansi
• ngokukhuthaza noma ngokudumisa amatimu ezocansi ahlobene nokudlwengula, ukulalana kwezihlobo, noma ukulala nesilwane

Okuqukethwe Okungekho Emthethweni

Umthetho umthetho. Kungakhathaliseki ukuthi ungubani, kuyisibopho sakho ukuthobela imithetho nezimiso ezisebenzayo. Okufanele ukugweme:

Okuqukethwe okwephula imithetho esebenzayo nezimiso kuhlanganisa, kodwa akugcini:

• ngokuqukethwe okungathobeli unswinyo olusebenzayo kanye nemithetho yokuthekelisa
• ngokuqukethwe okuhloselwe ukuphromotha noma ukwenza isenzo esingekho emthethweni sanoma yiluphi uhlobo

Okuqukethwe okwephula amalungelo obunikazi bempahla yabanye kuhlanganisa, kodwa akugcini:

• ngokuqukethwe okunikezwe i-Spotify ngaphandle kokuthola izimvume ezidingekayo
• ngokuqukethwe okwephula amalungelo okushicilela noma izimpawu zokuhweba zenkampani yangaphandle

I-Spotify iyiphoqelela kanjani le mithetho?

I-Spotify ifuna ukusebenzisa le mithetho ngokungaguquki nasezingeni lomhlaba wonke isebenzisa inhlanganisela yobuchwepheshe nokubuyekeza okwenziwa abantu. Ngaphezu kwemibiko yomsebenzisi, sisebenzisa amathuluzi azenzakalelayo athembele enhlanganiseleni yezinkomba ukuze sithole okuqukethwe okungahle kwephule Imithetho Yenkundla yethu.

Sinamaqembu omhlaba ochwepheshe abathuthukisa, agcina futhi aphoqelela Imithetho Yenkundla yethu. Uma kubikwa okuqukethwe okungenzeka kwephula umthetho, amathimba ethu azosebenza ukuze athathe isinyathelo esifanele sokuphoqelela.

Kwenzekani uma imithetho yephulwa?

Sibheka lezi zinqumo njengento ebucayi futhi sicabangela umongo lapho sihlola okungase kube ukwephulwa Kwemithetho Yenkundla yethu. Ukwephula imithetho kungase kuphumele ekususweni kokuqukethwe okwephula umthetho ku-Spotify. Ukwephulwa komthetho okuphindayo noma okushaqisayo kungase kuphumele ekutheni ama-akhawunti amiswe kanye/noma anqanyulwe. Funda kabanzi mayelana nezinye izinyathelo esingase sizithathe ngokuqondene nokuqukethwe noma ama-akhawunti lapha.

Yini enye engidinga ukuyazi?

Le Mithetho Yenkundla izosiza ekuqinisekiseni ukuthi i-Spotify ihlala iyinkundla evulekile nephephile yabo bonke. Sizoqhubeka nokuhlola nokubuyekeza lolu lwazi njengoba kudingeka, ngakho sicela uphinde uhlole njalo. Kuye ngokuthi yimiphi imikhiqizo noma izici ze-Spotify ozisebenzisayo, ungase ube ngaphansi kwezimfuneko ezengeziwe.

Ngingayibika kanjani inkinga?

Ingabe ikhona inkinga oyithole ngengxenye yokuqukethwe ku-Spotify? Uma ikhona sazise ngokuyibika lapha.