Правила на платформата Spotify

Мисијата на Spotify е да го ослободи потенцијалот на човечката креативност – давајќи им можност на милиони креативни изведувачи да живеат од своите дела и давајќи им можност на милијарди обожаватели да уживаат и да се инспирираат од нив. Веруваме дека постигнувањето на оваа мисија на нашата платформа е можно со прифаќање на различните форми на уметничко изразување, идеи, перспективи и гласови. Тоа може да значи дека одредени содржини на нашата платформа можеби нема да им се допаднат на сите поединци или дека се содржини кои ги поддржува Spotify.

Но, тоа не значи дека сѐ е дозволено на нашата платформа. Покрај условите со коишто се согласи, а ја уредуваат твојата употреба на нашите услуги, овие правила помагаат да се овозможи безбедност и пријатно доживување за сите.

Кои се правилата?

Без разлика дали си музичар, поткастер или друг соработник, важно е да знаеш што не е дозволено на нашата платформа. Примерите во долунаведените делови служат за илустрација и не се исцрпни.

Опасни содржини

Spotify е дом на заедници во кои луѓето можат да создаваат, да се изразуваат, да слушаат, да споделуваат, да учат и да се инспирираат. Не промовирај насилство, не поттикнувај омраза, не малтретирај, не вознемирувај и не учествувај во какво било друго однесување кое може да создаде ризик од сериозни физички повреди или смрт на луѓе. Што да избегнуваш:

Содржините што застапуваат или величаат сериозна физичка штета врз поединец или група вклучуваат, но не се ограничени на:

• поттикнување, промовирање или величање самоубиство и самоповредување (ако ти или некој што го познаваш се бори со или размислува за самоповредување, види тука за начини за добивање помош)
• поттикнување на или закани за сериозни физички повреди или насилни дејства врз конкретна цел или конкретна група

Содржините што промовираат тероризам или насилен екстремизам вклучуваат, но не се ограничени на:

• величање или фалење насилни екстремистички групи или нивни членови
• координирање, промовирање, закани со или величање насилни дејства од страна на или во име на насилни екстремистички групи или нивните членови
• овозможување упатства или материјали со упатства за извршување насилни екстремистички дејства
• барање од поединец или група да финансира, да преземе насилно екстремистичко дејство или да биде дел од активностите на некоја насилна екстремистичка група

Содржините што таргетираат поединец или група што може да се идентификува за малтретирање или поврзана злоупотреба вклучуваат, но не се ограничени на:

• повеќекратно таргетирање конкретни поединци со сексуално додворување
• повеќекратно таргетирање малолетно лице за да се предизвика срам или заплашување
• споделување или повторно споделување неконсензуални интимни содржини, како и закани за дистрибуирање или споделување на таквите содржини
• споделување, закани за споделување или поттикнување на другите да споделуваат нечии приватни податоци, вклучувајќи податоци за кредитни картички или банкарски податоци, матични броеви итн.

Содржините што поттикнуваат насилство или омраза кон лице или група луѓе врз основа на раса, религија, родов идентитет или израз, пол, етничка припадност, националност, сексуална ориентација, ветерански статус, возраст, инвалидитет или други карактеристики поврзани со системска дискриминација или маргинализација вклучуваат, но не се ограничени на:

• величање, поддршка или повици за насилство врз лице или група на луѓе врз основа на карактеристиките наведени погоре
• дехуманизирачки изјави за лице или група врз основа на заштитените карактеристики наведени погоре
• промовирање или величање групи за омраза и слики и/или симболи поврзани со нив

Содржините што промовираат опасни лажни или опасни измамнички медицински информации што може да предизвикаат реална штета или претставуваат директна закана за јавното здравје вклучуваат, но не се ограничени на:

• тврдење дека СИДА, COVID-19, рак или други животозагрозувачки болести се лага или не постојат
• поттикнување на конзумирање производи што содржат белило за лекување разни болести и заболувања
• промовирање или сугерирање дека вакцините одобрени од страна на локалните здравствени власти се создадени за да предизвикаат смрт
• охрабрување на луѓето намерно да се инфицираат со COVID-19 за да создадат имунитет за вирусот (на пр. промовирање или организирање „коронавирус-забави“)

Содржините што промовираат незаконска продажба на регулирани или незаконски добра вклучуваат, но не се ограничени на:

• продажба на незаконско оружје или делови од оружје
• продажба на дрога
• продажба на загрозени видови или производи добиени од загрозени видови

Содржините што промовираат, бараат или овозможуваат сексуална злоупотреба или експлоатација на деца вклучуваат, но не се ограничени на:

• визуелни прикази на малолетни лица вклучени во сексуален чин или развратни прикази на голи малолетни лица
• промовирање сексуална злоупотреба врз дете во замена за пари
• поттикнување или промовирање сексуална привлечност од возрасни кон малолетни лица
• промовирање, нормализирање или величање на несоодветно однесување кон деца

Измамнички содржини

За создавање одлични доживувања на Spotify е потребна доверба дека луѓето се тие кои велат дека се, дека нема да ги измамат и дека никој не се обидува да манипулира со нашата платформа. Не користи злонамерни практики за да ги измамиш другите. Што да избегнуваш:

Содржините што лажно се претставуваат како други за да измамат некого вклучуваат, но не се ограничени на:

• користење на истото име, слика и/или опис како друг постоен создавач
• претставување како друго лице, бренд или организација на начин што дава лажна слика

Содржините што промовираат манипулирани и синтетички медиуми како автентични на начини што претставуваат ризик од штета вклучуваат, но не се ограничени на:

• аудио или видеоснимка што потекнува од реален и валиден извор што е променета на начин што го менува значењето или контекстот на оригиналната медиумска содржина и се тврди дека е вистина, и со тоа претставува ризик за говорникот или за други поединци
• аудио или визуелни медиуми што се вештачки создадени преку употреба на технологија за коишто се тврди дека се вистинити, како дигитално произведени сексуални аудио и видеосодржини или содржини што лажно сугерираат дека некој извршил кривично дело

Содржините што се обидуваат да манипулираат со или да ги попречат процесите поврзани со избори вклучуваат, но не се ограничени на:

• лажно претставување на процедурите во граѓански процес што може да го обесхрабрат или да го спречат учеството во истиот
• лажни содржини што се промовираат за заплашување или потиснување на гласачите во однос на нивното учество на избори

Содржините што се обидуваат да ја искористат заедницата на Spotify вклучуваат, но не се ограничени на:

• објавување, споделување или нудење упатства за имплементирање злонамерен софтвер или поврзани злонамерни практики чија цел е да нанесат штета или да добијат неовластен пристап до компјутери, мрежи, системи или други технологии
• кражба на идентитет или поврзани обиди за измамничко барање или собирање чувствителни информации
• промовирање инвестициски и финансиски измами како шеми за брзо збогатување и пирамидални шеми, или поинакво поттикнување на другите да даваат пари со лажно наведување

Чувствителни содржини

Имаме еден куп неверојатни содржини на Spotify, но постојат одредени нешта што не ги дозволуваме на нашата платформа. Не објавувај прекумерно насилни или сликовити содржини и не објавувај сексуално експлицитни содржини. Што да избегнуваш:

Содржините што промовираат сликовити или непотребни прикази на насилство, крвави сцени или други шокантни слики вклучуваат, но не се ограничени на:

• сериозно масакрирани или распарчени тела
• промовирање суровост или тортура врз животни

Содржините што содржат сексуално експлицитни материјали вклучуваат, но не се ограничени на:

• порнографија или визуелни прикази на гениталии или голотија претставени за сексуално задоволство
• застапување или величање сексуални содржини поврзани со силување, инцест или зоофилија

Незаконски содржини

Законот си е закон. Без разлика на твојот идентитет, твоја одговорност е да се придржуваш до важечките закони и прописи. Што да избегнуваш:

Содржините што ги прекршуваат важечките закони и прописи вклучуваат, но не се ограничени на:

• содржини што не се придржуваат до важечките санкции и прописи за извоз
• содржини што се наменети за промовирање или извршување какво било незаконско дејство

Содржините што ги нарушуваат правата на интелектуална сопственост на другите вклучуваат, но не се ограничени на:

• содржини обезбедени на Spotify без да се набават неопходните дозволи
• содржини што ги прекршуваат авторските права или трговските марки на трети лица

Како Spotify ги спроведува овие правила?

Spotify настојува доследно и сразмерно да ги спроведува ваквите правила насекаде во светот, со комбинација од технологија и човечки прегледи. Покрај корисничките извештаи, користиме автоматски алатки што зависат од комбинација на сигнали за откривање содржини што можеби ги прекршуваат нашите „Правила на платформата“.

Имаме глобални тимови експерти кои ги развиваат, одржуваат и спроведуваат нашите „Правила на платформата“. Кога ќе се пријават или ќе се откријат содржини коишто потенцијално ги прекршуваат правилата, нашите тимови ќе преземат соодветни дејства за спроведување.

Што се случува кога ќе се прекршат правилата?

Сериозно ги сфаќаме овие одлуки и го имаме предвид контекстот кога ги проценуваме можните прекршувања на „Правилата на платформата“. Кршењето на правилата може да доведе до отстранување на содржината што ги крши правилата од Spotify. Повторените или екстремните прекршувања може да доведат до суспендирање и/или укинување на сметките. Дознај повеќе за другите дејства што може да ги преземеме за содржините или сметките тука.

Што друго треба да знам?

Овие „Правила на платформата“ ќе помогнат Spotify да остане отворена и безбедна платформа за сите. Ќе продолжиме да ги проценуваме и да ги ажурираме информацииве според потребите, па проверувај редовно. Во зависност од производите или карактеристиките на Spotify што ги користиш, можеби подлежиш на дополнителни услови.

Како да пријавам проблем?

Најде проблем со некоја содржина на Spotify? Ако е така, извести нѐ така што ќе пријавиш тука.