अभिभावक वा हेरचाहकर्ताहरूका लागि मार्गदर्शन

Spotify जस्ता प्लेटफर्महरूले अभिभावक र बच्चाहरूलाई सँगै अन्वेषण गर्ने, शैक्षिक सामग्री भेट्टाउने र सङ्गीत सुन्ने एउटा अद्वितीय अवसर प्रदान गर्दछन्। तपाईंहरूमध्ये केहीले तपाईंका बच्चाहरूलाई सुताउनका लागि लोरीका प्लेलिस्टहरूबाट फाइदा उठाउनुभएको छ भने अरू धेरैले आफ्ना बच्चालाई आफू उनको उमेरको हुँदा मन पराएको कुनै खास गीत सुनाउन पाएर दङ्ग छन्। पछिल्ला वर्षहरूमा बालबालिकाले प्रयोग गर्न सक्ने अनलाइन प्लेटफर्महरूको सङ्ख्यामा धेरै वृद्धि भएको छ र बालबालिकाले त्यस्ता प्लेटफर्महरू प्रयोग गर्दा उनीहरूलाई कसरी सुरक्षित राख्ने भन्ने कुरा थाहा पाउन सजिलो नहुन सक्छ।

म AlexHolmes हुँ र मेरो भूमिका भनेको Spotify लगायतका ठुला सोसल मिडिया कम्पनीहरूलाई तिनको विश्वव्यापी सुरक्षा सल्लाहकार बोर्डहरूमा आबद्ध भएर तिनलाई सुरक्षा र अनलाइन हानिसम्बन्धी रणनीतिहरूका सम्बन्धमा सुझाव दिनु हो। म राजकुमारी Diana को युवाहरूमा संसार परिवर्तन गर्ने शक्ति छ भन्ने विश्वासले अभिप्रेरित गैरनाफामुखी संस्था The Diana Award को सहायक प्रमुख कार्यकारी अधिकृत पनि हुँ। मैले म 16 वर्षको हुँदा म माथि नै दादागिरी देखाइएपछि पियर-टु-पियर सहायता कार्यक्रम एन्टी-बुलिङ एम्बेसेडरू स्थापना गरेँ। स्पष्ट रूपले भन्नु पर्दा, म बच्चाहरूको खुशी र कल्याणका सम्बन्धमा आउने कुनै पनि अवरोधलाई सम्बोधन गर्न उत्सुक छु।

म सधैँ अभिभावकले आफ्ना छोराछोरीहरूलाई अनलाइन संसारमा सुरक्षित राख्न मिलेर काम गर्नु पर्छ भन्ने सुझाव दिन्छु। उनीहरूले कस्तो प्रकारको सामग्री सुन्दा तपाईं सहज महसुस गर्नुहुन्छ भन्ने विषयमा छलफल गर्नुहोस् र सो सामग्रीले उनीहरूलाई दुखी वा चिन्तित बनाएमा उनीहरू के गर्न सक्छन् भन्ने कुरा बुझ्न मद्दत गर्नुहोस्। Spotify को बालबालिका सुरक्षित राख्ने प्रतिबद्धताको अंशका रूपमा Google ले एउटा गाइड तल राखेको छ।उक्त गाइडमा तपाईंले बालबालिकालाई अश्लील सामग्रीबाट जोगाउन प्रयोग गर्न सक्ने अभिभावकीय नियन्त्रण र तपाईंले कुनै पनि अनावश्यक सामग्री वा ध्यानका बारेमा रिपोर्ट गर्ने तरिकालगायत Spotify ले बालबालिकाका लागि डिजाइन गरिएका सबैभन्दा नयाँ टुल तथा सुविधाहरूको रुपरेखा तयार गर्छ।

तपाईंका बच्चाले प्रयोग गर्न सक्ने विभिन्न प्लेटफर्महरूनिगरानी गर्न कठिन हुन्छ; म सबै अभिभावक वा बच्चाको हेरचाह गर्ने व्यक्तिहरूलाई आफ्ना बच्चालाई Spotify का बारेमा, उनीहरूले सुन्ने सङ्गीतका प्रकारका बारेमा र उनीहरूले अरूसँग गर्ने अन्तर्क्रियाका बारेमा बुझाउन प्रोत्साहित गर्छु। बच्चाहरूलाई उनीहरूले अरू बच्चाहरूसँग गर्ने व्यवहारका बारेमा र उनीहरूले प्लेलिस्टका शीर्षक, प्रोफाइल तथा प्लेलिस्टका फोटो/अपलोड गरिएका सामग्री हेर्दा ध्यान पुर्‍याउनु पर्छ भन्ने कुरा बुझाउनु पनि उपयोगी हुन सक्छ। बच्चाहरूलाई उनीहरूका प्लेलिस्ट आफूलाई सेयर गर्न प्रोत्साहित गर्नुहोस्, यसो गर्नाले सामग्री चयन गर्ने र आपसमा अन्तर्क्रिया गर्ने र स्वस्थ संवाद गर्ने मौका मिल्न सक्छ।

सङ्गीत र अडियो भनेका बालबालिकाले आफूलाई व्यक्त गर्न र संसारलाई बुझ्न सिक्ने महत्त्वपूर्ण तरिकाहरूमध्येका एक हुन्। तपाईं बालबालिकालाई सही तरिकाले मद्दत गरेर उनीहरूलाई आफ्नो गोपनीयता, स्वतन्त्रता र आफ्नो बच्चा हुर्काउने शैलीबिच सन्तुलन कायम गर्दै अझ आत्मविश्वासी, दरिलो र उत्सुक बनाउन Spotify जस्ता टुलहरू प्रयोग गर्न सक्नुहुन्छ। अन्त्यमा, आफ्ना बच्चासँग यी विषयमा कुरा भनेको बालबालिकाले डिजिटल संसारका बारेमा सिक्दै जाँदा तपाईं उनीहरूलाई मद्दत गर्न सदैव तत्पर हुनुहुन्छ भन्ने कुरा देखाउने एउटा उत्कृष्ट तरिका हो।

Alex Holmes

बाल सुरक्षा विशेषज्ञ

www.antibullyingpro.com

बच्चाहरूका लागि सुरक्षित वातावरण तयार गर्ने सम्बन्धमा

Spotify भनेको विश्वभरका क्रिएटरका लाखौँ गीत, पोडकास्ट र अडियोबुकलगायतका सामग्री सुन्ने सुविधा प्रदान गर्ने एउटा डिजिटल सेवा हो। अभिभावकका लागि बालबालिकाको डिजिटल संसार निगरानी गर्ने कार्य चुनौतीपूर्ण हुन सक्छ र तपाईंको परिवारका निम्ति उपयुक्त हुने सामग्री र सुविधाका बारेमा गरिने निर्णयहरू प्रायः व्यक्तिगत हुन्छन् भन्ने कुरा हामी बुझ्छौँ। सुरक्षित र रमाइलो अनुभव गर्न सकियोस् भन्नाका लागि हामीले विभिन्न किसिमका महत्त्वपूर्ण उपायहरू अवलम्बन गरेका छौँ। ती उपायहरू यस प्रकार रहेका छन्:

• हामीसँग बालबालिकालाई हानी पुर्‍याउने सामग्रीका सन्दर्भमा शून्य सहिष्णुता नीति छ र प्लेटफर्मका नियमहरूले बालबालिकालाई हानि गर्ने कुनै पनि गैर कानुनी र/वा अपमानजनक व्यवहारहरूलाई प्रतिबन्ध लगाउँछन्
• नीति र/वा कानुनको सम्भावित उल्लङ्घनहरू भेट्टाउन मेसिन लर्निङ सङ्केतको फाइदा लिन र प्रयोगकर्ताको रिपोर्टिङ संयन्त्रहरू प्रयोग गर्न
• हामीले नीति उल्लङ्घन गर्ने सामग्रीको समीक्षा गर्न र सोका हकमा तुरुन्तै कारबाही गर्न चौबीसै घण्टा काम गर्ने कर्मचारीका टोलीहरू खटाएका छौँ
• आत्महत्या, आत्मघात र अव्यवस्थित खाने सामग्रीसँग सम्बन्धित सामग्री खोज्दा सम्भावित रूपमाकमजोर प्रयोगकर्ताहरूको मानसिक स्वास्थ्य स्रोतहरूका बारेमा बुझ्न
• हाम्रा टोलीहरू सम्भावित खतरा र न्यूनीकरणका प्रविधिहरूसँग अप टु डेट रहन्छन् भन्ने कुरा सुनिश्चित गर्न हाम्रो Spotify Safety Advisory Council का विशेषज्ञहरू जस्तै Thorn र Diana Award तथा Jed Foundation, Tech Coalition र WeProtect Alliance का साझेदारहरूबाट सक्रिय रूपमा प्रतिक्रिया माग्ने।

बालबालिकाका सुरक्षा आवश्यकताहरू बढ्दै जाँदा हामी हाम्रा नीति, संयन्त्र तथा विधिहरू परिष्कार गर्दै लैजाने छौँ। त्यतिन्जेल, आमा/बुवा वा अभिभावकका रूपमा हामीलाई एउटा सुरक्षित प्लेटफर्म तयार गर्ने कार्यमा सघाउनका निम्ति तपाईंले चाल्न सक्ने कदमहरूका बारेमा थाहा पाउन कृपया पढ्न जारी राख्नुहोस्।

तपाईंका बच्चाको Spotify चलाउँदाको अनुभव

खाता बनाउने सम्बन्धमा

सबै प्रयोगकर्ताहरूले आफ्नो खातासँग सम्बन्धित देशको उमेरको न्यूनतम मापदण्ड अनिवार्य रूपमा पूरा गर्नु पर्छ। तपाईंको बच्चाको उमेर Spotify प्रयोग गर्न पाउने न्यूनतम उमेरभन्दा कम छ वा उनले अन्य प्रकारले हाम्रो प्रयोगका सर्तहरूका मापदण्डहरू पूरा गर्दैनन् भने उनको खाता अनिवार्य रूपमा बन्द गर्नु पर्छ।

खाता बनाउँदा आफ्नो बच्चाको उमेर सही रूपमा हालिएको छ भन्ने कुरा सुनिश्चित गर्नुहोस्। यसो गर्दा हामीलाई स्थानीय कानुनहरूको पालना भएको छ भन्ने कुरा सुनिश्चित गर्न र उमेर सुहाउँदा सुविधाहरू प्रदान गर्न मद्दत पुग्छ।

Premium Family योजनाहरू

निश्चित बजारहरूमा हामी हाल हाम्रो Premium Family योजना अन्तर्गत निम्न सुविधाहरू प्रदान गर्छौँ:

• Spotify Kids विशेष गरी बालबालिकाका लागि तयार पारिएको एउटा छुट्टै एप हो। यसमा साना बालबालिकालाई अझ उपयुक्त र आकर्षक सङ्गीत र सामग्री समावेश हुन्छन्। थप जान्न यहाँ क्लिक गर्नुहोस्।

तपाईंले प्रिमियम पारिवारिक योजना रोजे वा नरोजे पनि Spotify ले तपाईंलाई आफ्नो परिवारका लागि उत्कृष्ट सुन्ने सुविधा बनाउन मद्दत गर्न विभिन्न टुलहरू प्रदान गर्छ।

तपाईंका बच्चाहरूका लागि सुरक्षित प्लेटफर्म तयार पार्ने सम्बन्धमा

आफ्नो परिवारका लागि कुन प्रकारको सामग्री सबैभन्दा उपयुक्त छ भन्ने बारेमा गरिने निर्णयहरू पूर्ण रूपमा व्यक्तिगत हुन सक्छन्। आफ्नो परिवारको सुविधा अझ प्रभावकारी बनाउन मद्दत गर्न तपाईं अश्लील सामग्री हेर्न छोड्ने वा विशेष कलाकारहरूको प्लेब्याक नियन्त्रण गर्ने बारेमा विचार गर्न सक्नुहुन्छ।

अश्लील सामग्रीको फिल्टर

क्रिएटर र राइट्स होल्डरहरूले प्रायः वयस्क लक्षित भाषा वा विषयवस्तुहरू समावेश हुन सक्ने सामग्रीलाई "अश्लील सामग्री" का रूपमा चिन्ह लगाउँछन् वा तिनमा "E" ट्याग हाल्छन्। अश्लील सामग्रीका रूपमा चिन्ह लगाइएको सामग्री स्किप गर्न तपाईं यहाँ दिइएका निर्देशनहरू पालना गर्न सक्नुहुन्छ।

विशेषज्ञको सुझाव: तपाईं साझा डिभाइसबाट वा बच्चाको उपस्थितिमा सङ्गीत बजाउँदै हुनुहुन्छ (उदाहरणका लागि, परिवारको सडक यात्रा वा जन्मदिनको पार्टी), तपाईंको "अश्लील सामग्री" नामक फिल्टर अन गर्नुभयो भने अवाञ्छित असहज क्षणहरूबाट बच्न सकिन्छ।

विशेषज्ञको सुझाव: कहिलेकाहीँ "अश्लील" का रूपमा ट्याग गरिएको सामग्रीका सम्पादित संस्करणहरू Spotify मा भेटिन सक्छन्।

सही रूपमा ट्याग नगरिएको गीत, पोडकास्ट वा अडियोबुकका बारेमा रिपोर्ट गर्न यहाँ गई हामीलाई सम्पर्क गर्नुहोस्।

खास कलाकारहरूको प्लेब्याक नियन्त्रण गर्ने

तपाईं कलाकारको प्रोफाइलमा गएर, 3 थोप्लामा क्लिक गरेर र हरेक खाताअन्तर्गत रहेको "नबजाउनुहोस्" मा क्लिक गरेर आफ्नो मोबाइल डिभाइस वा आफ्नो पारिवारिक योजनाका अन्य सदस्यहरूको मोबाइल डिभाइसमार्फत कुनै खास कलाकारको प्लेब्याक नियन्त्रण गर्न सक्नुहुन्छ।

सामग्रीलाई "रुचि छैन" का रूपमा चिन्ह लगाउने

मोबाइल प्रयोगकर्ताहरू आफूले पाउने सुविधा अझ राम्रोसँग नियन्त्रण गर्न "रुचि छैन" बटन प्रयोग गर्न पनि सक्छन्। तपाईंले "रुचि छैन" भनी चिन्ह लगाउने सामग्री तुरुन्तै तपाईंको सबफिडबाट हटाइने छ र फेरि देखिने छैन। उक्त सामग्री तयार पार्ने कलाकार/पोडकास्ट सोका अन्य कुनै पनि गीत/एल्बम/भागलाई पनि भविष्यका सिफारिसहरूबाट फिल्टर गरी हटाइने छ।

नीतिको उल्लङ्घन गर्ने सामग्रीका बारेमा रिपोर्ट गर्ने सम्बन्धमा

Spotify मा भएका सबै सामग्रीले अनिवार्य रूपमा स्थानीय कानुन र हाम्रो प्लेटफर्मका नियमहरूको पालना गर्नु पर्छ। यी नियमहरू Spotify Safety Advisory Council लगायत विश्वभरका सुरक्षा विशेषज्ञहरूबाट प्रतिक्रिया लिएर हाम्रा सुरक्षा नीति विशेषज्ञहरूको आफ्नै टोलीले बनाएका हुन्। सामग्रीको तुरुन्तै समीक्षा गर्ने र उचित कारबाही गर्ने कुरा सुनिश्चित गर्नका लागि हामीले विश्वभर चौबीसै घण्टा कर्मचारीहरू खटाइएका छौँ।

हाम्रा नीति तथा कार्यान्वयनसम्बन्धी दृष्टिकोण स्थिर हुँदैनन् र यी कुराहरू दुरुपयोगको प्रवृति, विश्वव्यापी नियम कानुन, सामग्रीका नयाँ प्रकार र हाम्रा विश्वसनीय सुरक्षा साझेदारहरूले दिएका प्रतिक्रियाका आधारमा तयार पारिन्छन्।

तपाईंलाई कुनै सामग्रीले हाम्रो प्लेटफार्मका नियमहरूको उल्लङ्घन गर्न सक्छ जस्तो लाग्छ भने कृपया हाम्रो यो फारम प्रयोग गरी उक्त सामग्रीबारे रिपोर्ट गर्नुहोस्। रिपोर्ट गर्ने अरू विकल्पहरूका बारेमा थप जान्न हाम्रो सुरक्षा र गोपनीयता केन्द्रमा जानुहोस्।

Spotify मा गोपनीयता

हामी हाम्रा प्रयोगकर्ताहरूका साथै बालबालिकाहरूको व्यक्तिगत जानकारी सुरक्षित राख्न प्रतिबद्ध छौँ र प्रयोगकर्ताहरूको जानकारी सुरक्षित छ भनी सुनिश्चित गर्न मद्दत गर्नका लागि संयन्त्रहरू तयार पारेका छौँ। हामीले व्यक्तिगत जानकारी प्रयोग गर्न सक्ने केही तरिकाहरू भनेका तपाईंको भाषामा सिफारिसहरू प्रदान गर्ने, हामीलाई तपाईंले रमाइलो गर्न सक्नुहुन्छ भन्ने लागेको पोडकास्टको सिफारिस गर्ने वा तपाईंलाई मन पर्ने नयाँ कलाकार पत्ता लगाउन मद्दत गर्ने हुन्।

हामी तपाईंको जानकारी, तपाईंको गोपनीयतासम्बन्धी अधिकार र छनौटहरू र तपाईंका सेटिङ कसरी मिलाउने भन्ने बारेमा थप जान्नका लागि कृपया हाम्रो सुरक्षा तथा गोपनीयता केन्द्र हेर्नुहोस् र हाम्रो गोपनीयता नीति पढ्नुहोस्।